انا ولد الملوك الزلزلو الطغيان
وللذي حرام اتقال انت منو
وتسوي شنو
بسوي الدنيا بالفيها
وارجع اسال الاجداد
دا كان عندك جزور واصول
اصلي حفيد بعانخي وابنو ترهاقا
وما تنساه شبتاكا
وكان عاجبك ومالي عينيك نهر النيل
انحنا قرنا في الخرطوم
هناك في بقعة امدرمان
وانا القاش الطمح طوفان
انا التاكا
وبرضو تقول لي انت منو
وتسوي شنو
*****
انا حلفا ديل ناس الشرق اهلي
وهناك اقصي الشمال اصلي
واسوا شنو
انا الجرجار
وبرضو الطار واسوا شنو
انا الضرعاتو لي نجم السماء بتطول
وانا حلفاوي ليها بقول
وكل الدنيا عارفاني
وقول من تاني انت منو
وتسوي شنو
عشان ما يمر عليك الحول
يمين ما يمر عليك الحول
انا الطورية والكوريك
انا الفرار انا المنجل
كنت ذمان جريت لامريكا
بالكورية تتسول
لولا اهلي
لولا قمحنا لولا الفول
ده السودان
بدون ناس حلفا دون تاريخهم
يسوي شنو
وده السودان بدون النوبة دون امجادهم
يسوي شنو
ما الايام بتتكلم
وفي كل يوم لينا حديث جديد بتقال
وفي كل خطوة في السودان
انحنا حضارة ما بتتطال
ونحن منو
*****
نحن عزاز
ونحن لزاز
ونحن نخيل ونحنا حراز
ونحن ( افيلقو مسكاقرو )
ونحن بناتنا نص الليلة مابتنشاف
ونحن اولادنا عز الحارة ما بتخاف
وبرضو تقول لي نحن منو
ونسوي شنو
*****
انحنا اسود
ولينا الموت بعافنا عديل
وما تغتر بالكاكي
انحن لبسنا
لبسناه للجنيات
وبرضو الكاكي لبسو حريم
ما ناس حلفا يوم الحارة
ببقو نمور
وببقو نسور
ويوم السلم ذي انسام رقيقة تهيم
انحن منو
انحن صباح
وفرقا شتي ما بين ليل
وما بين فجر
شمسو ترف علي الافاق تنير مجدو
وبينا وبين حضاراتكم
مسافات بي الاوف وميئات
من السنوات بيتعدو
ديل اهلي السالتا عليهم
شموخهم بحكي ليك توتيل
رقابهم للسماء امتدو

وشكرا الشاعر مهند صالحين